/90/
EXERCITATIO XII
Protagorae opinionem explicat et rationes.
Protagoras Abderita Dei providentiam
negare non est ausus, quod bona quamplurima
in hisce inferioribus conspiceret,
quae sane a summo aliquo bono dependere
necessario exstimavit, quandoquidem in
seipsis talia non sunt: nam de novo acquirunt
et acquisita amittunt. Cum autem malis
atque sceleribus repletum undique orbem
circumspiceret, Deum Deique providentiam
confiteri dubitavit, quare dicere
consueverat: «Si Deus non est, unde igitur bona?
si autem est, unde mala?». Caeterae auctoris huius
rationes nobis perspectae non sunt, quod
libri illius in foro exusti fuerint, quia impiis
referti essent dogmatibus: ne quis novi
exempli rem arbitretur, libros haereticorum
modo concremari. Arenoso tamen illo Protagoraeo
fundamento freti, moderni Athei
argumentorum molem superextruxerunt
vastissimam, quorum haec sunt praecipua.
1. Vel Deus cognoscit hominum peccata,
vel non. Si cognoscit, igitur efficit. Scientia
namque Dei causat res. Si non cognoscit,
ergo mundi temperationem non curat. Haec